ආබාධිත රණවිරුවන්ගේ රැකවරණය සහ පුනරුත්ථාපනය සඳහා කැප වූ ශ්‍රී ලංකා යුධ හමුදාව විසින් පවත්වාගෙන යනු ලබන සත්කාර මධ්‍යස්ථානයක් වන අනුරාධපුරයේ පිහිටි අභිමංසල සුවතා මධ්‍යස්ථානයට ඩේවිඩ් පීරිස් සමූහය විසින් පරිත්‍යාග කරන ලද නවාතැන් මධ්‍යස්ථාන දෙක සම්පූර්ණයෙන් පිළිසකර කර යළි බාර දීම පසුගියදා සිදු කෙරුණි.
මෙම නවැතැන් මධ්‍යස්ථාන යුගලය ඩේවිඩ් පීරිස් සමූහය විසින් 2011 වර්ෂයේදී අභිමංසල ආරම්භ කිරීමේදී පරිත්‍යාග කළ අතර මේ වන විට එය යළි අලුත්වැඩියා කිරීමට අවශ්‍ය වී තිබුණි. ශ්‍රී ලංකා යුධ හමුදාවේ ඉල්ලීම මත නැවතත් මෙම මධ්‍යස්ථාන යුගලය අලුත්වැඩියා කිරීමට ඉදිරිපත් වුණු ඩේවිඩ් පීරිස් සමූහයේ සමාජ සුබ සාධක අංශය විසින් මුදල් වැය කර එහි තීන්ත ආලේප කිරීම, දැවමය අලුත්වැඩියාවන්, ගෘහ භාණ්ඩ, තිර රෙදි, විදුලි වැඩි දියුණු කිරීම්, රූපවාහිණී යන්ත්‍ර ලබාදීම ඇතුළුව පූර්ණ අලුත්වැඩියාවක් සිදු කරන ලදී. මෙම වැඩි දියුණු කිරීම් තුළින් රට වෙනුවෙන් තම ජීවත කැප කළ රණවිරුවන්ට සුවපහසු පරිසරයක් නිර්මාණය කිරීමට අරමුණු කෙරේ.
ප්‍රතිසංස්කරණය කරන ලද මධ්‍යස්ථාන යුගලය ඩේවිඩ් පීරිස් මෝටර් කම්පැනි (ලංකා) ලිමිටඩ් නියෝජ්‍ය ප්‍රධාන නිළධාරී – මෙහෙයුම් කෝසල රත්නායක මහතා විසින් ශ්‍රී ලංකා හමුදාවට නිළ වශයෙන් බාර දෙන ලදී. එම අවස්ථාවට අභිමංසල අණදෙන නිලධාරී බ්‍රිගේඩියර් ප්‍රියන්ත ලියනගේ ඇතුළු යුධ හමුදාවේ ජ්‍යෙෂ්ඨ නිලධාරීන්, ඩේවිඩ් පීරිස් සමූහයේ සමාජ සුභසාධන කමිටුවේ සාමාජිකයින් වන ඩේවිඩ් පීරිස් හෝල්ඩිංග්ස් (ප්‍රයිවට්) ලිමිටඩ් නියෝජ්‍ය අංශ භාර කළමනාකරු – වාහන විකුණුම් සම්පත් වීරකෝන්, අභ්‍යන්තර සහ බාහිර සන්නිවේදන ප්‍රධානී දසුන් එදිරිසිංහ, ඇසට්ලයින් ෆිනෑන්ස් ලිමිටඩ් කළමනාකරු – අය කර ගැනීම් දුමින්ද ඒකනායක, අලෙවි විධායක නිර්මාණ ඩයස් යන මහත්වරු සහභාගී විය.
එහිදී අදහස් දැක්වූ ඩේවිඩ් පීරිස් මෝටර් කම්පැනි (ලංකා) ලිමිටඩ් නියෝජ්‍ය ප්‍රධාන නිළධාරී – මෙහෙයුම් කෝසල රත්නායක මහතා මෙසේ පැවසූවේය. “යුද්ධය අවසන් වී කෙටි කලකට පසු අපගේ රණවිරුවන්ගේ පරිහරණය උදෙසා අපි මේ මධ්‍යස්ථාන දෙක පරිත්‍යාග කිරීම සිදු කළා. රණවිරුවන්ට අපගේ ගෞරවය දැක්වීමේ සංකේතයක් ලෙස අපි එම කර්යය සිදු කළ අතර ඉන් වසර 14කට පසුවත් අපි එම මධ්‍යස්ථාන රැකබලා ගැනීම සිදු කරනවා. මෙම මධ්‍යස්ථාන ප්‍රතිසංස්කරණය කිරීමට ලැබීම අපිට ආඩම්බරයක්.”
ඩේවිඩ් පීරිස් සමූහයේ සමාජ සුභසාධන කමිටුව විසින් මෙපමණක් නොව අඩු ආදායම්ලාභී පවුල් සඳහා අංගසම්පූර්ණ නිවාස පරිත්‍යාග කිරීම, රෝහල් සඳහා වෛද්‍ය උපකරණ සැපයීම, බරපතල රෝගාබාධවලින් පෙළෙන පුද්ගලයින්ට මූල්‍ය ආධාර ලබා දීම, විවිධ ආබාධ සහිත පුද්ගලයින්ට සහාය වීම, ග්‍රාමීය පොදු ප්‍රවාහන පහසුකම් වැඩිදියුණු කිරීම, පාසල් ගොඩනැගිලි, පරිගණක විද්‍යාගාර, පානීය ජලය සහ පාසල්වලට අවශ්‍ය අනෙකුත් උපකරණ සැපයීම මෙන්ම අධ්‍යාපනය නඟා සිටුවීමට සහ ව්‍යවසාකත්ව පුහුණු වැඩසටහන් හරහා කාන්තාවන් දිරිමත් කිරීම මෙන්ම සිසුන්ට ශිෂ්‍යත්ව ලබා දීමද සිදු කරනු ලබයි.
දශක තුනකට අධික ඉතිහාසයක් ඇති ඩේවිඩ් පීරිස් සමූහය ශ්‍රී ලංකාවේ විශාලතම සහ මූල්‍යමය වශයෙන් වඩාත් ස්ථාවර සමාගම් සමූහයක් ලෙස හැදින්විය හැකිය. මෝටර් රථ වාහන නිෂ්පාදන සහ සේවා, මූල්‍ය සේවා, ලොජිස්ටික්ස් සහ ගබඩා පහසුකම්, විනෝදාත්මක ක්‍රියාකාරකම් සහ මෝටර් ක්‍රීඩා, තොරතුරු තාක්‍ෂණ, දේපළ වෙළඳාම්, නාවික සහ සමුද්‍රීය සේවා සහ සූර්ය බලශක්තිය ඇතුළු ක්ෂේත්‍රවල විහිදුණු සමාගම් 35කින් සමන්විත ඩේවිඩ් පීරිස් සමූහය ප්‍රජාව නඟා සිටුවීමට නිරතුරුව කැපවී සිටී.
ඡායාරූප: ඩේවිඩ් පීරිස් මෝටර් කම්පැනි (ලංකා) ලිමිටඩ් නියෝජ්‍ය ප්‍රධාන නිලධාරී – මෙහෙයුම් කෝසල රත්නායක මහතා, ප්‍රතිසංස්කරණය කරන ලද මධ්‍යස්ථානයක් පීත්ත පටිය කපා විවෘත කළ අයුරු. අභිමංසල අණ දෙන නිලධාරී බ්‍රිගේඩියර් ප්‍රියන්ත ලියනගේ, නියෝජ්‍ය අංශ කළමනාකරු – වාහන විකුණුම් සම්පත් වීරකෝන්, ඩේවිඩ් පීරිස් හෝල්ඩිංග්ස් (ප්‍රයිවට්) ලිමිටඩ් අභ්‍යන්තර හා බාහිර සන්නිවේදන ප්‍රධානී දසුන් එදිරිසිංහ සහ ඇසට්ලයින් ෆිනෑන්ස් ලිමිටඩ් කළමනාකරු – අයකර ගැනීම් දුමින්ද ඒකනායක යන මහත්වරුද ඡායාරූපයේ වෙති.
